ಬೆಳಗಿನ 30 ನಿಮಿಷ ಬದಲಿಸುವ ದಿನ

ದಿನ ಹೇಗೆ ಆರಂಭವಾಗುತ್ತದೆಯೋ ಹಾಗೆಯೇ ಮುಂದುವರಿಯುತ್ತದೆ. ಮೊಬೈಲ್ ನೋಡಿ ಎದ್ದರೆ ದಿನ ಪೂರ್ತಿ ಬೇರೆಯವರ ಅಜೆಂಡಾ; ಅರ್ಧ ಗಂಟೆ ನಿಮಗಾಗಿ ಇಟ್ಟುಕೊಂಡರೆ ದಿನ ನಿಮ್ಮದು. ಕಲ್ಪತರು ಸುರಭಿ ಗುಂಪಿನಲ್ಲಿ ನಾವು ವರ್ಷಗಳಿಂದ ಮಾಡುತ್ತಿರುವ ಸರಳ ದಿನಚರಿ ಇದು.

1. ಎದ್ದ ಕೂಡಲೇ ನೀರು ಮತ್ತು ಕೃತಜ್ಞತೆ (5 ನಿಮಿಷ)

ಒಂದು ಲೋಟ ನೀರು ಕುಡಿಯಿರಿ. ನಂತರ ಕಣ್ಣು ಮುಚ್ಚಿ ನಿನ್ನೆಯ ಮೂರು ಒಳ್ಳೆಯ ವಿಷಯಗಳನ್ನು ನೆನಪಿಸಿಕೊಳ್ಳಿ. ಸಣ್ಣವು ಸಾಕು — ಒಳ್ಳೆಯ ಊಟ, ಒಂದು ಕರೆ, ಒಂದು ನಗು.

2. ಉಸಿರಾಟ (5 ನಿಮಿಷ)

ನಾಲ್ಕು ಎಣಿಸುತ್ತಾ ಉಸಿರು ಒಳಗೆ, ನಾಲ್ಕು ಎಣಿಸುತ್ತಾ ಹಿಡಿದು, ಆರು ಎಣಿಸುತ್ತಾ ಹೊರಗೆ. ಹತ್ತು ಬಾರಿ. ಇದು ನರಮಂಡಲವನ್ನು ಶಾಂತಗೊಳಿಸುತ್ತದೆ; ಸುರಭಿ ಕ್ರಿಯಾದ ಮೊದಲ ಹೆಜ್ಜೆ ಇದೇ.

3. ಸ್ವಯಂ ರೇಖಿ ಅಥವಾ ಮೌನ (10 ನಿಮಿಷ)

ರೇಖಿ ಕಲಿತಿದ್ದರೆ ಹೃದಯ ಮತ್ತು ಹೊಟ್ಟೆಯ ಮೇಲೆ ಕೈ ಇಟ್ಟು ಕೂರಿ. ಕಲಿತಿಲ್ಲದಿದ್ದರೆ ಕೇವಲ ಮೌನವಾಗಿ ಉಸಿರನ್ನು ಗಮನಿಸಿ. ಯೋಚನೆಗಳು ಬಂದರೆ ಬರಲಿ; ಮತ್ತೆ ಉಸಿರಿಗೆ ಬನ್ನಿ.

4. ಗುರಿ ಬರೆಯುವುದು (5 ನಿಮಿಷ)

ಒಂದು ನೋಟ್‌ಬುಕ್‌ನಲ್ಲಿ ಇಂದಿನ ಮೂರು ಮುಖ್ಯ ಕೆಲಸಗಳು ಮತ್ತು ಈ ವರ್ಷದ ಒಂದು ದೊಡ್ಡ ಗುರಿಯನ್ನು ವರ್ತಮಾನ ಕಾಲದಲ್ಲಿ ಬರೆಯಿರಿ. ಪ್ರತಿದಿನ ಅದೇ ಗುರಿ. ಸುಪ್ತ ಪ್ರಜ್ಞೆಗೆ ಪುನರಾವರ್ತನೆ ಇಷ್ಟ.

5. ಒಂದು ಪುಟ ಓದು (5 ನಿಮಿಷ)

ಯಾವುದಾದರೂ ಒಳ್ಳೆಯ ಪುಸ್ತಕದ ಒಂದು ಪುಟ. ಹೆಚ್ಚು ಬೇಡ. ವರ್ಷಕ್ಕೆ 365 ಪುಟ ಆಗುತ್ತದೆ.

ಈ ಐದನ್ನೂ ಒಂದೇ ದಿನ ಪರಿಪೂರ್ಣವಾಗಿ ಮಾಡಬೇಕಿಲ್ಲ. ಈ ವಾರ ಮೊದಲ ಎರಡು, ಮುಂದಿನ ವಾರ ಮೂರನೆಯದು — ಹಾಗೆ ಬೆಳೆಸಿ. ಜೊತೆಯಾಗಿ ಮಾಡುವವರು ಇದ್ದರೆ ಸುಲಭ; ಕಲ್ಪತರು ಸದಸ್ಯರು ಪ್ರತಿದಿನ ಬೆಳಿಗ್ಗೆ Zoom ನಲ್ಲಿ ಒಟ್ಟಿಗೆ ಇದನ್ನು ಮಾಡುತ್ತಾರೆ.

ಗುರುದತ್ತ ವಿ. ಮರಾಠೆ
Reiki Growth Coach · ಕಲ್ಪತರು ಸಂಸ್ಥಾಪಕ